හිමිවීම, අහිමිවීම, සමාව දීම වගේම මනුෂ්‍යත්වය ගැන වූ අපූරු පාඩමක්. (The Light Between Oceans)

‘‘මුහුද, මුහුද නොවන කාලයක් තියෙනවා. ඒ නිල් පැහැය, වතුර එලෙසින්ම නොපැවතුණත් ශක්තිය වගේම භයානකත්වය පුපුරා ගිය එක් මොහොතක් උදාවෙනවා. දෙවියන්ටම පමණක් අඬ ගසන්නට හැකි රෞද්‍ර මොහොතක් එළඹෙනවා. රළ එකිනෙක මත වැටෙමින්, පොර බදිමින් මුහුද, තමන්වම වගේම දූපතත් රිදවන්නට පටන් ගන්නවා. තමන්ගේ සීමාව ගැන නොදන්න මෘගයෙක් ගොරවනවා වගේ සද්දයක් එවැනි මොහොතකදී මුහුදෙන් නැගෙන්න ගන්නවා. මේ වගේ රැයකදී ආලෝකයක් නැතුවම බැහැ‘‘  M. L. Stedman – The Light Between Oceans

මුහුද අද්දර ගෙවෙන ජීවිතත් මුහුද වගේ. මේ ජීවිත වලට කොයි මොහොතකදී කුණාටුවක් එළඹේදැයි කියන්නට බැහැ. කුණාටුවකදී නොසන්සුන් වුණු ජීවිත, කුණාටුවෙන් පස්සේ නොයෙක් වියවුල් මැද්දේ වුණත් පෙර ලෙසම සන්සුන් වෙන්න ගන්නවා. ඒත්, කුණාටු සමයේදී මුහුණදෙන්නට වුණු දුෂ්කරතා කිසිලෙසකින් වත් අතීතයට එක්කරන්නට හැකිවෙන්නේ නැහැ. The Light Between Oceans. 2016 දී එළිදුටු සිනමාපටයක්. එම්.එල්. ස්ටෙඩ්මන් මෙනමින්ම රචනා කළ කෘතිය සිනමාපටයක් බවට පත්කරන්නේ ඩෙරික් සියැන්ෆ්‍රාන්ස් විසිනුයි.

ටොම් ෂර්බෝන් පළවෙනි ලෝක යුද සමයේදී සටන් වැදී අසීරුවෙන් සිය ජීවිතය ගළවාගෙන හමුදා සේවයෙන් ඉවත් වූ නිළධාරියෙක්. බටහිර ඕස්ට්‍රේලියාවේ ජූන්ස් කන්දේ තිබෙන ප්‍රදීපාගාරයේ ආලෝක මෙහෙයුම්කරුවා ලෙස කටයුතු කරන්නට ඔහුට අවස්ථාව හිමිවෙනවා. මේ ආසන්නයේ දිවිගෙවන ඉසබෙල් ග්‍රේස්මාර්ක් සමග පෙමින් බැඳෙන ටොම් 1921 දී ඇය හා විවාහ වෙනවා. ආදරය, සෙනෙහස මුසු වුණු මේ කැදැල්ලේ එකම එක අඩුවක් පැවැතුණා. ඒ සුරතල් දරුවෙකු ගැන වූ හීනයයි.

අවුරුදු තුනක් ඇතුළතදී දෙවරක්ම ඉසබෙල්ගේ කුසේ දරුවෙකු පිළිසිඳ ගත්තත් ඒ දරුගැබ අකාලයේ මිලින වෙන්නේ දරු සුරතල් බලන්නට ඇයට හිමි වාසනාව අහිමි කරමිනුයි. තමන්ට කෙදිනකවත් මවක් වන්නට නොහැකි වනු ඇති බවට ඇය බියට පත්වෙනවා. ඉසබෙල් මුහුණදුන්නු දෙවැනි ගබ්සාවෙන් ටික කලකට පස්සේ හිටිහැටියේම ඔවුන්ගේ ජීවිත වෙනස් වෙන්නට ගන්නවා. මළ මිනිසෙකු හා අලුත උපන් සිඟිත්තියක හොවා තිබුණු පුංචි ඔරුවක් ඔවුන් හිටි මුහුදු වෙරළට ගහගෙන එනවා. මෙවැනි සිද්ධීන් සම්බන්ධයෙන් අනිවාර්යයෙන්ම තමන්ගේ ලොග් පොතේ සටහන් තැබිය යුතු බව ටොම් හොඳාකාරවම දැන හිටියා. පුංචි දැරියව අනාථ නිවාසයකට යොමු කරාවි යැයි බිය වුණු ඉසබෙල්, ටොම්ගෙන් බැගෑපත්ව ඉල්ලා හිටින්නේ මේ දැරියව ඇගේම දරුවෙක් කරගන්නටයි.

“ඉතිං, අපි අසරණ දරුවෙකුට රැකවරණ දීම ඇර වෙන කිසිම වැරැද්දක් කරලා නැහැනේ. මේ මනුස්සයට ගෞරවාන්විත අවසානයක් උරුම කරන්න අපිට පුළුවන්. නීති රීති කියන දේවල් ඔයාට කොයිතරම් නම් වටිනවද කියලා මම දන්නවා. ඒවා තියෙන්නේ මොකටද ? ජීවිත බේරගන්නයි. අපි මේ ජීවිතයත් බේරගමු” තමන් කරන්න යන කටයුත්ත සාධාරණීකරණය කරමින් ඉසබෙල්, ටොම් ළඟ හඬා වැළපෙනවා.

අමනාපයෙන් වුණත් බිරිඳගේ ඉල්ලීමට කන්දෙන ටොම් ඒ වනවිටත් මිය ගිහිං හිටිය මනුස්සයව මිහිදන් කරදමා ඔරුව නැවතත් මුහුදේ පාවෙන්නට හරිනවා. ඉසබෙල්ට ලැබුණු මේ මහාර්ඝ තිළිණය ලුසී ලෙස නම්කරනවා. පුංචි කැදැල්ලට තිබුණු එකම අඩුවත් මැකී ගියාට පස්සේ ඉසබෙල්ගේ වගේම ටොම්ගේ ජීවිතත් ලුසී වටා බැඳෙන්න ගන්නවා.

හුදෙකලා දූපතේ ප්‍රදීපාගාරයට කොටුවුණු ජීවිතෙන් මිදිලා ලුසීව භෞතීස්ම කරන්නට ඉසබෙල් හා ටොම් නගරයට යනවා. මේ අතරතුරදී හැනා රොඑන්ෆෙල්ට් නම් කාන්තාවක්, ෆ්‍රෑන්ක් රොඑන්ෆෙල්ට් නම යෙදූ  සොහොනක් අභියස හිඳිමින් කාන්තාවක් වැළපෙන අයුරු අහම්බෙන් වගේ ටොම්ගේ නෙත ගැටෙනවා. ග්‍රේස් ඇලන් නම් වූ ඔවුන්ගේ දියණිය මුහුදේදී අතුරුදහන් වී තිබෙන්නේ ඔවුන්ට ලුසීව හමුවූ 1923 අප්‍රේල් 26 වැනිදා වකයි. ඉතිං, මේ සිද්ධිය කිසිසේත්ම අහඹුවක් නොවෙයි.  ලුසී, හැනාගේ දියණියක් වනු ඇතැයි යන අනියත බියක් ටොම් තුළ නැගෙන්න ගන්නවා. ගතවෙලා ගිය ජීවිතේ සිද්ධි එකින් එක ආයෙත් වෙනස් කරන්න හැකියාවක් ලැබුණා නම්. සමහරවිට, ටොම්ගේ හිතෙන් මේ අනියත බිය නැතිකර දමන්නට තියෙන්න ඇති.

නීතිය, ඇත්ත, යුක්තිය, සාධාරණත්වය මේ කුමකින් ගැළවුණත් මිනිහෙක් තමන්ගේ හෘද සාක්ෂියෙන් ගැළවෙන්නේ කොහොමද ?. එක පසෙකින් කාලයක් පුරා විළිලෑ ඉසබෙල්ගේ බලාපොරොත්තුව මල් ඵල ගැන්වී තිබෙනවා. අනෙක් පසින් අකාලයේ අහිමි වී ගිය තමන්ගේ සැමියා හා බිළිඳිය වෙනුවෙන් දුක් වෙන නන්නාදුනන මවක්. ටොම්ගේ ආශාව යටපත් කරදමමින් සාධාරණය වෙනුවෙන් පෙනී හිටින හදවත එළියට එන්න ගන්නවා.

ටොම් නමක් නොයොදා හැනා වෙත ලිපියක් යොමුකරමින් පවසන්නේ, ඇගේ සැමියා මියගොස් ඇති නමුත්, ළදැරිය තවමත් සුරක්ෂිතව ජීවත් වන බවයි. හැනාගේ දියණිය අහිමිවී වසර හතරක් ගතවී ගිය මොහොතකදී දැරිය ගැන ලැබෙන ආරංචිය ඇයව අමන්දානන්දයට පත්කරන්නට හේතු වෙනවා.   

ලුසී, ටොම් හා ඉසබෙල් නැවත වරක් ටොම්ගේ ප්‍රදීපාගාරය ගැන වුණු සැමරුමකට යන අතරතුරදී හැනා හා ඇගේ සොහොයුරිය වූ ග්වෙන් පොට්ස්ව මුණගැසෙයි. මියගිය ෆ්‍රෑන්ක් ජර්මන් ජාතිකයෙකු වුණු බවත් පළමු ලෝක යුද සමයෙන් පසුව පැවති ආන්දෝලනාත්මක වටපිටාව හමුවේ හැනා ඔහු හා විවාහ වුණු බවත් ඔවුන් වටහාගන්නවා. මහමඟ බීමතින් ගිය පිරිසක් ෆ්‍රෑන්ක්ට අඩන්තේට්ටම් කළ අවස්ථාවේදී ඔහු ඔරුවකට පැන ළදැරිය ද සමගින් පලාගිය පුවත කණවැකෙන ටොම්ට තමන් ගැනම වරදකාරී හැඟීමක් දැනෙනවා. හැනා ගැන වුණු පුවත අහන ඉසබෙල් ද දැඩි කම්පනයට ලක්වෙනවා.

සිය හෘද සාක්ෂියෙන් ගැළවෙන්නට නොහැකි වූ ටොම් පුංචි දැරිය හමුවන වෙලාවේදී තිබුණු පුංචි සෙල්ලම් බඩුවක් හැනාගේ තැපැල් පෙට්ටියට දමනවා. අතිවිශාල මුදල් ත්‍යාගයක් දෙන බව පවසමින් මෙහි ඡායාරූප ඇතුළත් කරපු පෝස්ටර් වීදි පුරා අලවන හැනා තමන්ට අහිමි වී ගිය දරුවා කෙදිනක හෝ හමුවනු ඇතැයි යන අසීමිත බලාපොරොත්තුවෙන් පසුවෙනවා.

අවසානේදී ටොම්ගේ මිතුරෙක් ඔහුගේ නිවසේදී මෙය දුටු බවට ඔත්තුවක් දෙනවා. රහස හෙළිවෙනවා.  එතැන් පටන්  දරුවෙකුගේ  ලෝකය, රැක බලාගත් මව සහ වැදූ මවගේ  ආදරය බලාපොරොත්තුව  හා හිමිකාරීත්වය අතර දෝලනය වන්නට පටන් ගන්නවා. හුණු වටයේ කතාවට වඩා වෙනත් පසුබිමක් මෙහි දකින්නට ලැබෙනවා. වරද කොහිද ? ලූසීගේ පියාගේ මරනයත් සමග අහම්බයකින්  දරුවන් අහිමි ටොම් ගේ පවුල ආලෝකමත් වීමත් ලුසී වැදූ මව තම ස්වාමිපුරුෂයා හා දියනියගේ අහිමි වීමෙන් වේදනාබරිත ජීවිතයකට මුහුන දීමත් අතරින් දරුවකුගේ ලෝකයේ හිමිකාරීත්වය තීරනය කිරීමට මිනුම්දඩු තිබිය හැකිද ?. ආදරය වේදනාව හිමිකාරීත්වය  මොන අම්මා ළඟද ?.  වැදූ මව ළඟද ? නැත්නම් හැදූ මව ළඟද ?. විනිශ්චයක් දෙන්න ඉදිරිපත් වෙන්නේ කවුද ?.  දරුවාගේ පස ඇතී පිඩාකාරීත්වයට කවුරු නම් වගකිව යුතුද ?. පීඩාවෙන් සිටින දරුවාගේ වැදු මවට ලුසී ජීවත් වන බවට හෙලිකරන ටොම් ගේ  හර්දසාක්ෂිය හා දරුවාට අවසානයේ  මුහුන දෙන්නට සිදුවන පිඩාව සමපාත වන බව හැර අන් කිසිවක් ගැන නිශ්චිත අදහසකට පැමිණිය හැක්කේ කාටද?.    

ටොම් බලාපොරොත්තු වුණු අන්දමින්ම ඔහුගේ නිවසට කඩාවදින පොලීසිය තිදෙනාවම නගරයට රැගෙන යන්නේ ටොම්ට මෙන්ම ඉසබෙල්ට ද දඬුවම් පැමිණවීමේ අරමුණිනුයි. පුංචි සිඟිත්තියක් ලෙස තමන්ගේ හැබෑ මාපියන් සමීපයේ හැදී වැඩුණු ලුසී ඇයගේ මතකයේ රැඳී තිබෙන, ඇයව ආදරෙන් රැකබලාගත් මාපියන්ගෙන් වෙන් වෙන්නේ කොහොමද ?.

ඉසබෙල්ව සම්පූර්ණයෙන්ම වරදෙන් නිදහස් කරන ටොම් ඔහු අතින් වරදක් සිදුවුණු බව භාරගැනීමත්, ටොම් විසින් ලුසීව  සිය මාපියන්ට භාර කරන්නට උත්සහ දරන බව සිතන ඉසබෙල් ඔහුව අත්අඩංගුවට පත්වුණාට පසු ඔහු සමග පවතින සියලු සබඳතා අත්හැර දැමීමත් සිදුවනවා. හිමිවීම් ~ අහිමිවීම් මැද ඉසබෙල් නැවතත් තමන් ගතකළ පරණ පුරුදු ජීවිතයට සීමා වෙනවා.

ලුසීගේ අයිතිය ඇගේ හැබෑ මවට හිමිවුණත්, හැනා තමන්ගේ මව ලෙසින් පිළිගන්නට ලුසී අකමැති වෙනවා. තනිවම වෙරළ වෙත යන ලුසී ප්‍රදීපාරය වෙත යන්නටත් උත්සහ දරනවා. නමුත්, පසුව ටිකෙන් ටික සැබෑ මව වෙත සමීප වන ලුසී බොහෝ කලක් ගතවන තෙක් ටොම් හා ඉසබෙල්ව හමුවන්නේ නැහැ.

ටොම් ෆ්‍රෑන්ක්ව මරා දැමූ බවට පොලීසිය චෝදනා කරන අතර තමන්ට අහිමි වුණු ලුසීගේ මතකය සමගින් වියවුලට පත්වුණු ලුසී නිසා ටොම්ව සාධාරණීකරණය කරමින් කරුණු ඉදිරිපත් කරන්නට ඉසබෙල්ට නොහැකි වෙනවා. ඔරුව ඇතුළතදී ෆ්‍රෑන්ක් මියගොස් සිටි බව හෙළිදරව් කරන්නට ඉසබෙල්ට නොහැකි වෙනවා. ටොම්ගේ නඩු විභාගය සඳහා  ඔහුව ඇල්බනි වෙත රැගෙන යාමට සුළු මොහොතක් තිබියදී ඔහුගෙන් ඉසබෙල් වෙත ආව ලියුමක් ඇයට ලැබෙනවා. තමන්ට කිසිදිනක සතුට උරුම නැති බවත් යුද්ධයෙන් දිවි ගලවාගත් අයෙකු විදියට ජීවිතම කාලය පුරාවටම ඔහුට දරන්නට සිදුවී තිබෙන දෝෂාරෝපණ ගැනත් ටොම් මෙහි සඳහන් කර තිබෙනවා. ටොම්ව රැගෙන යන බෝට්ටුවට පනින ඉසබෙල් ඉතාම උද්වේගකර විදියට පවසන්නේ,

‘‘ඔරුව වෙරළට ගොඩගසන විටත් ෆ්‍රෑන්ක් මැරිලා හිටියා. මේ සිද්ධිය ගැන කිසිම දෙයක් ලොග් පොතේ ලියන්න එපා කිව්වේ මමයි” ටොම්ව ආදරයෙන් වැළඳගන්න ඉසබෙල් ඇය කළ වරද වෙනුවෙන් පෙනී හිටිනවා.

“මට සමාවෙන්න” ඉසබෙල්ව වැළඳගනිමින් ටොම් පවසන්නේ ඔහු මේ සිද්ධියට වරදකරුවෙකු බව විශ්වාස කරමිනුයි.

අද අප මුහුන දෙන ලෝකය තුල  ජීවිත වල වටිනාකම තේරුම්ගන්න හැකිවෙන්නේ කාටද ?. අවසානයේදී සිද්ධියේ සම්පූර්ණ වගකීම භාරගෙන ඉන්න පොලිස් නිළධාරියා හැනාව හමුවෙන්න යනවා.

‘‘එයා එහෙම කිව්වද ?‘‘ ඉසබෙල්ගේ පාපොච්චාරණය ගැන පොලිස් නිළධාරියාගෙන් ප්‍රශ්න කරන හැනා විමසනවා. ‘‘ඔව්, එයා ජූන්ස් වලට යන්න කලින් බොහොම වැදගත් විදියට මෙහේ ජීවත්වුණා. මෙහෙන් ගියාට පස්සේ නම් එයාට කිසිම හොඳක් වෙලා නැහැ.‘‘ පොලිස් නිළධාරියා පවසනවා.

“දැන් ඒගොල්ලන්ට වෙන්නේ මොකක්ද ?” හැනාට උත්තර දෙන පොලිස් නිළධාරියා පවසන්නේ ‘‘ඔවුන් හිරගෙට යාවි‘‘ කියලයි.

“කොච්චර කාලෙකටද ?” ආයෙත් හැනාගෙන් ප්‍රශ්නයක්.

“එයාලා කරපු වරද ගැන හිතන්න සෑහෙන තරම් කාලෙකට”

‘‘රොඑන්ෆෙල්ට් නෝනා, මිනිස්සු එයාලා අතින් වුණු වැඩ වලට වගකියන්න ඕන. ඒත්, ඒ මිනිස්සු සමහර සීමාවන් පහුකරගෙන යද්දි ඒවාගේ ප්‍රතිවිපාකත් අත්විඳින්න වෙනවා. මං ඒ අය වෙනුවෙන් මෙහෙමවත් කතා කළේ ඔබ, ඒ අය වෙනුවෙන් පුංචි හරි කරුණාවක් දක්වාවි කියලා හිතලයි. එහෙම වුණොත් බොහෝ දුරට පුංචි දඩයකුත් එක්ක, මාස කීපයක් විතරක් හිරේ ගතකරන්න වේවි‘‘ පොලිස් නිළධාරියා අනෙකෙකුගේ ජීවිත වෙනුවෙන් කතාකරනවා.

“ජීවිතයේ එක වතාවක් විතරක් සමාව දෙන්න සිද්ධ වෙනවා” හැනා තමන්ටම කියාගන්නවා. ජීවිතයේ යථාර්තය තේරුම්ගන්න හැනා සමාව දෙන්න සූදානම් වෙනවා.

අවසානයේදී ලුසී තමන් බිහිකළ මව මෙන්ම ඇගේ සීයා සමග ද සබඳකම් ඇතිකරගන්න සමත්වෙනවා. ලුසී ග්‍රේස් යන නමින් තමන්ව ආමන්ත්‍රණය කරන්නට ලුසී ඉඩ දෙනවා.

තරුණ ලුසී ග්‍රේස් රදර්ෆොර්ඩ් තමන්ගේ සිඟිති දරුවා වන ක්‍රිස්ටෝපර් එක්ක ටොම් හමුවෙන්නට යනවා. කාලය ගතවෙලා ගිහිං. ඒ 1950 වසරයි. ඉසබෙල් තවදුරටත් ජීවතුන් අතර නැහැ. ගත වූ වසර 20 ක කාලය තුළ දී ලුසී හා ටොම්ගේ පවුල අතර කිසිදු සබැඳියාවක් සිදුව නොතිබුණේ ලුසීගේ ළමා සමයේදී කිසිදු අන්දමකට මේ දෙපිරිස අතර සම්බන්ධතාවක් පවත්වා නොගැනීමට තිබූ එකඟතාවන් සමගිනුයි. ඉසබෙල්, ලුසීගේ මතකයත් සමගින් බොහෝ කලක් ජීවත් වෙලා. කවදහරි දවසක ලුසීව මුණගැසුණොත් ඇයට ලබාදෙන්නැයි පවසා ඉසබෙල් දී තිබුණු ලියුමක් මෙහිදී ටොම් ඇගේ අතට පත්කරනවා. තමන් දැන සිටි එකම තාත්තා වන ටොම්ට ස්තුති කරන ලුසී ඇයව හදාවඩා ගැනීම ගැන ටොම්ට තුති පළකරන අතර ඉදිරියේදී ඔහුට සමීපව ඉන්නට පොරොන්දු වෙනවා.

හිමිවීම, අහිමිවීම, සමාව දීම වගේම මනුෂ්‍යත්වය ගැන වූ අපූරු පාඩමක් The Light Between Oceans සිනමාපටය අපට කියාදෙනවා.

ඩෙරික් සයන්ෆ්‍රාන්ස්ගේ අධ්‍යක්ෂණයක් වුණු මේ සිනමාපටය 2016 වසරේදී එළිදැක්වෙන්නේ ඩේවිඩ් හේමන් හා ජෙෆ්රි ක්ලිෆර්ඩ්ගේ නිෂ්පාදනයක් විදියටයි. මයිකල් ෆාස්බෙන්ඩර්, ඇලීෂියා විකන්දර්, රැචල් වේස්, බ්‍රයන් බ්‍රවුන්, ජැක් තොම්සන් මෙහි රංගනයෙන් දායක වෙනවා. ඇලෙක්සැන්ඩර් ඩෙස්ප්ලැට් සංගීතයෙන් දායක වන මෙහි සිනමා රූපණය ඇඩම් ආකපෝ විසිනි. ඩ්‍රීම් වර්ක්ස් සමාගමේ සිනමාපටයක් වන The Light Between Oceans ජිම් ‍හෙල්ටන් හා රොන් පැටනේගේ සංස්කරණයකි. ඇ.ඩො.මි. 20 ක් වැය කර නිමවූ මෙම සිනමාපටයෙන් ඇ.ඩො.මි. 26 ක ආදායමක් උපයා ගැනීමට හැකිවෙනවා.  

|සටහන – වින්ධ්‍යා ගම්ලත්|

Share this

Related posts